«Романсиада без границ — 2016» конкурс туэ 11-тӥзэ ортчиз. Москвае люкаськылӥзы Россиысь но кунгож сьӧрысь усточиос.

13 апреля 2016

Удмурт филармониысь солистка Лилия Третьякова верамъя, крезьгуро искусствоез гажасьёслы «Романсиада» кыл тодмо, 1997-тӥ арын Москваын таӵе нимын кылдӥз ӟуч романсъёслы сӥзем конкурс.

— Ӵапак та вожвылъяськон усьтӥз трос выль нимъёсты но туннэ тодмо артистъёсты: Карина Сербинаез, Мария Людькоез, Дмитрий Шумейкоез, Диана Савельеваез, Марина Поплавскаяез, Ирина Крутоваез но трос мукетъёссэ. Конкурсэ пыриськон понна валтӥсь курон — романсъёсты яратон. Бен, дунъясьёс быръё устозэ, но котькуд ӵошатскисьлы та конкурс луонлык сётэ ассэ возьматыны, репертуарзэ узырмытыны, выль авторъёсын тодматскыны, мукет усточиосын эшъяськыны.

Удмуртиысь кырӟась вожвылъяськиз профессионалъёс пӧлын. Конкурс 3 люкетлэсь вал. Нырысетӥяз котькуд усточи быдэстыны кулэ вал кык романс. Кыкетӥ люкетаз одӥг романс но ӟуч композиторлэсь ик эшшо одӥг кырӟанзэ. Куинетӥяз — кык романс, но одӥгез соос пӧлысь туала произведение луыны кулэ вал. Лилия Третьякова быдэстӥз В. Гаврилинлэсь «Любовь останется», М. Штейберглэсь «Гайда, тройка», А. Петровлэсь «Оплавляются свечи», А. Варламовлэсь «Что мне жить и тужить», М. Таривердиевлэсь «Нет, эти слёзы не мои» но Д. Покрасслэсь «Всё, что было» романсъёссэс.

Жюри вылӥ дунъяз Удмуртиысь усточилэсь куаразэ но кырӟамзэ. Лилия Третьякова 3-тӥ степенё лауреат луиз. Вормисьёс пӧлын озьы ик Москваысь, Гатчинаысь, Вологдаысь, Курскысь, Томскысь, Моздокысь усточиос.







Автор статьи — Галина Савина

Фото — Удмуртская филармония

Источник — Удмурт дунне   http://udmdunne.ru/2016/04/udmurt-kun-filarmoniys-artistka-liliya-tretyakova-moskvays-vormonehn-bertz/