«Шулдыр ӝыт» ансамбльысь ненег куара — Эльвира Панченко — 8-тӥ Мартлы дась: кильтро дэрем вуремын, выль кырӟанъёс гожтэмын, квартира выльдэмын.

09 марта 2016

панченко

Удмурт егит кырӟасьёс сцена дӥсь ласянь йырзэс зол тӥяло. Та ласянь Панченколы юртто Интернет но газет-журналъёс. Отысь Эльвира кунгожсьӧр артистъёслэсь аспӧртэмлыко образзэс шедьтэ но, соку ик вуриськисьлы Наиля Нуриевалы вазиське.

Собере Наиляен ӵош дӥсь малпаськомы, — вера кырӟась. — Али кильтро костюм пӧрмытймы. Сьӧд чилясь кулэсь со. Туж вакчи. Мугор вылын тач-тач пуке. Ульчаетй та дисен уд ветлы, нош сцена вылын — чапак интыяз. Учкись азе потан дэремъёсмес сак утьыса возиськомы. Угось соослы уксё трос кошке. Огез ичизэ 3 сюрс манет тыр усе.

Костюм сяна, Эльвиралэн выльдӥськиз квартираысьтыз огез сэрегез но. Комнатаязы чильк-вальк ремонт лэсьтӥллям — вол-вол, яркыт луиз, вера нылмурт.

Панченколэн вордиськизы на 2 выль кырӟанъёсыз. Михаил Михайловлэн кылбурезлы со гур гожтэм. Кыкетӥ гурезлы чуръёс Дарали Лели дасям. Кыкез но ужез сӥземын, пе, яратонлы.






Автор статьи — Ольга Корепанова

Фото — Наталья Сметанина

Источник — Удмурт дунне   http://udmdunne.ru/2016/03/panchenko-kiltro-d%D3%A5s-dasyaz/?s-dasyaz/