23-тӥ февральлы но 8-тӥ Мартлы сӥзьыса, Удмурт кун филармониысь «Шулдыр ӝыт» ансамбль концерт дасяз.

09 марта 2016

филармония

Сцена вылын ужаз кык коллектив: ачиз «Шулдыр ӝыт» но туала эктонъя Next академия. Концерт кыстӥськиз 2 час, но учкисьёслэн соин кӧтсы ӧзгес тыры кадь. Куд-огез лыктӥллям дышем сямен концерт учкыны, нош филармонилэн сценаез вылын вал зэмос туала шоу. Концертэз нуись Анатолий Галиханов туж чебер вераз: кырӟан но эктон — нылкышно но пиосмурт кадь, соосты ог-огзылэсь люкыны уг луы.

«Шулдыр ӝыт» ансамбльлэн кивалтӥсез Наталья Ушакова выль амалъёс утча концертъёсты аспӧртэмлыко карон но тросгес егит учкисьёсты кыскон понна. Со туж умой.

Next академиысь егитъёс туж зол тэтчазы, бергазы, позыръяськизы. Артистъёслэсь бере ӧз кыльы концертэз нуись Анатолий Галиханов но. Со учкисьёсты но шулдыртӥз, ассэ но ушъяны шедьтӥз, куд-ог артистъёсты но паймымон юанъёсыныз юмоке вуттылӥз. Ӵапак сыӵе ик луыны кулэ, дыр, зэмос ведущий.

Котькуд учкисьлэн аслаз адӟонэз но куронъёсыз. Кинлы ке туала эктӥсьёс ӧз кельше, нош егитъёслы яразы. Мукетъёсызлэн юанзы кылдӥз, малы ӧй вал сцена вылын Яна Белослудцева но Анна Плотникова. Куинетӥосызлы ваньмыз кельшиз, уго сцена вылын зол ужазы но мылкыдзэс сётӥзы Павел Васильев но Владимир Мальцев — мар кулэ на нылкышноослы, соос понна таӵе пиос кырӟало ке.





Автор статьи — Галина Семёнова

Фото — Наталья Сметанина

Источник — Удмурт дунне   http://udmdunne.ru/2016/03/kyran-no-ehkton-nylkyshno-no-piosmurt-kad/