Выль куаралэн нимыз — Максим Матвеев!

29 октября 2015

«Зарни перепеч» конкурс, Удмуртиысь арганчиослэн 2-тӥ фестивальзы, Россиысь арганчиослэн ӵошатсконзы… Егит арганчилэсь Максим Матвеевлэсь вормонъёссэ лыдъяса, кагаз уд тырмыты. Али пияш выль вормонэныз ушъяськыны быгатэ — Удмурт филармониын ортчем «Выль куара» проектын со нырысетӥ инты басьтӥз!

8hRRtWYm-T8

- Максим, кызьы тон астэ крезьгурен герӟад?

— Ачим мон Вавожысь. Отын улыкумы, мама монэ арганэн шудонъя кружоке сётӥз. 9-тӥ класс бере дышетскыны мынӥ Можгалась педколледже. Дыр ортчыса, валай, та мынам ӧвӧл шуыса. Выжи Ижысь Культурая училищеысь калык инструментъёсъя ёзэ. Но дышетӥсьёс тырмымтэен, лэся, та ёз ворсаськиз. Кошки Крезьгуръя элькун колледже, ёзмы дирижёрско-хоровой нимаське. Али «Сорока» ансамбльын кырӟасько. Дышетсконэ ар но ӝыны сяна ӧз кыльы. Мама азьвыл тамада вал, монэ сьӧраз арганчиен я кырӟасен кутылӥз.

- Паймисько: тон пӧртэм фестивальёсы но ӵошатсконъёсы пыриськиськод. Алигес Китайысь бертӥд. Кызьы дышетсконлы дырыд кыле на?

— Али Египетэ, Хургадае, мыныны малпасько. Сюлмы выль мылкыдъёс куре, улонам весь марзэ ке воштэме потэ. Китае но, номырлэсь кышкатэк, шумпотыса кошки. Но берпуметӥ толэзяз отын но акыльтӥз. Шундыљужан кунын ужай ӟуч паркын, котькуд нунал шулдыртылӥ калыкез, арганэн шудӥ ӟуч, удмурт гуръёсты. Ӝытъёссэ классика крезьгурез — вальс, Эдвард Григлэсь гуръёссэ — арганэн шудыны дышетски.

Египет сярысь мон тодӥ Интернетысь. «Вконтакте» бамысь ивор адӟи: Хургадае туристъёсты шулдыртыны арганчи кулэ. Кытчы ке кошкыны ӧдъясько ке, колледжын ивортӥсько. Кин ке та ветлэмъёсылы пумит кариське, малы со тыныд кулэ, шуо, кин ке мон понна шумпотэ. Тани Китае, академической отпуск басьтыса, кошки. Бертӥ, толэзь куспын дасяськи но вань экзаменъёсты сётӥ. Туж ик секыт ӧз йӧты. Азьланяз малпанэ вань: дышетсконме быдтэме бере Китае визь люканы мыно. Украинаысь тодмое али отын кылысь кылэ берыктӥсьлы дышетске. Малпанъёсам Испание но вуылыны.

Олокытчы но вуылыса, улонэз коть адӟоно. Китайын мон дыши шуг-секытъёсты вормыны. Мыным кельше, ку тон шаередлэсь кыдёкын но улонэд понна ачид кыл кутӥськод, озьы тон мурт адямиос пӧлын улыны дышиськод.

мм

Мыным кельше, ку тон шаередлэсь кыдёкын но улонэд понна ачид кыл кутӥськод, озьы тон мурт адямиос пӧлын улыны дышиськод.

- Анай-атаедлэн нош бордысьтызы кыдёке лэземзы потэ-а?

— Египет сярысь анаелы вераме бере со кӧня ке пумит луиз. «Нош ик со Интернетысьтыд оломае шедьтӥд ни! Египетын али террористъёс трос», шуиз. Мон солы валэктӥсько: юалляськи отын ужасьёслэсь, ваньмыз умой, отельын ужало, берло дыре пуштылонъёс Египетын ӧвӧл. Буйгатскиз но лэзиз. Атае нош шып ветлэ. Со но ас понназ сюлмаське, дыр. Песянайёсы кошкеме сярысь тодэмзы бере бӧрдыны кутскизы. Огвакытэ Китае эктӥсьёсты но модельёсты ужаны люкало вал, нош кошкыны мылкыды пуромиз. «Маdemoisselle Oudmourte» агентствоысь удмурт нылъёсты, Иван Белослудцевез но сьӧрам чортӥ. Соглаш луизы вал ни, но ӧз пӧрмы — Тиньзиньын пуштылонъёс луизы, паркез ворсазы.

- Нош «Выль куара» проектэ кызьы пыриськоно кариськид?

— Мынам туж потэ удмурт кылын кырӟаме. Нош «Выль куара» проект сыӵе луонлык сётӥз. Кастингын быдэстӥ ӟуч кылын «Моя душа рваная» кырӟанэз. Мон сое кылӥ «Голос» проектысь. Кыкетӥзэ «Не для меня придёт весна» калык кырӟанэз туала амалъя кырӟай. Яна Белослудцева, мынам дышетӥсе, жюриын пукиз но соку ик проектлэн кивалтӥсезлы Наталья Ушаковалы шуиз: «Мон аслым та пиез бырйисько!» Малпам, дуэтын быдэстом «Моя душа рваная» кырӟанэз — со кыкнамылы ик сюлэммыя луиз. Яна но шуиз: тон джаз, рок кырӟанъёсты быдэстыны пӧрмытӥськод. Удмурт кылэ кырӟанэз берыктӥз Миша Михайлов, кырӟан луиз «Кин, мае?» Огнам кырӟаны мон бырйи «Голос» проектын 2-тӥ инты басьтэм Александр Бонлэсь кырӟанзэ. Удмурт кылэ сое анае берыктӥз, «Вай лушкалом ог-огмес» шуыса нимаз.

- Кызьы конкурслы дасяськон мынӥз?

— Репетициосы мон арняяз 1-2 пол ветлылӥ. Кема дышетӥм текстъёсмес — ог 2 арня. Собере видеоосты учкылӥм, кызьы мукет артистъёс быдэсто милемын быръем кырӟанъёсмылы тупась мылкыдын ужъёсты. Тани «Вай лушкалом ог-огмес» лиричной, сюлме пырись гур. Соя ымныр но тупаны кулэ. Нош «Кин, мае?» — со рок, отын мылкыд уртчемез киос но мугор выремен возьматыны кулэ. Озьы ик та проектын мон нырысьсэ дуэтэн кырӟай. Ӧй верасал, туж секыт йӧтӥз шуыса. Ми Янаен ог-огмес умой валам.

мм1

Конкурсын мынам асме выль сямен усьтэме, кырӟаны быгатэмме возьматэме потӥз.

- Тонэ тросэз арганчиен тодо, нош ӵошатсконын огпол но аргандэ ӧд кутылы.

— Мынам асме выль сямен усьтэме, кырӟаны быгатэмме возьматэме потӥз. Соин ик арганлэсь куштӥськи. Туж потэ, удмурт кылын аслам кырӟанэ мед луоз шуыса. Ачим удмурт сямен уггес гожъяськиськы бере, ӟуч кылын текстсэ малпало, анае берыктоз, крезьгурзэ ачим лэсьто ни. Конкурсын вормеме понна кырӟан гожтыны луонлык сётӥсь сертификат кузьмазы. Вуоно арын уж борды кутско ни.
Зэмзэ ке, мынам удмурт кылме волятэме потэ, песянае доры Вавоже бертыса, «Удмурт дунне» газетэз лыдӟыны тыршисько. Удмуртиын «Выль куара» выллем ӟуч кылын проектъёс вань ке но, мон малпасько, отчы пыриськыса, номыр пайдазэ аслым уг басьты шуыса. Соин ик кырӟаны быгатэмме возьматон понна пыриськысал «Голос» проектэ. Таиз ласянь вуоно арын малпасько.

- Вормонъёсыд трос ни, «Выль куара» проектын но вормон мылкыдын кырӟад-а?

— Мон али но ӧй вала на, 1-тӥ инты басьтӥ шуыса. Концерт дыръя зол ӧй тулкымъяськы, катанчи сьӧрын сылыкумы, ми, конкурсантъёс, асьме сярысь ӧм, ог-огмы сярысь золгес сюлмаськылӥм. ми пӧлысь котькудӥзлэн аслаз пусйымон куараез, соин ик нокинэ ӧй висъялля. Анае, мон понна залын кесяськыса, куаразэ быдтэм. Песянайёсы шумпотыса бӧрдӥзы.

P. S. Вераськеммы бере М. Матвеев кошкиз «Сорока» ансамблен репетицие, ӝытаз, пе, поездэн Москвае, отысен — Хургадае. Но кошкыны кылдымтэ, пияш висьыны усем.

Мария Векшина

Туспуктэмъёсыз геройлэн

 

 

Источник: газета Удмурт дунне http://udmdunne.ru/2015/10/vyl-kuaralehn-nimyz-maksim-matveev/