«Россилэн сюлэмыз» — Удмуртиысь

29 октября 2015

 

Удмурт кун филармониысь артистка Лилия Третьякова, В. Толкунова нимо «Душа России» фестиваль-конкурсэ пыриськыса, 1-тӥ степенё лауреат луиз.

— Фестивальын 60-лэсь уно кырӟасьёс вал, — веранзэ мытэ Лилия Третьякова. — Сьӧд дэремен, тӧдьы боаэн сцена вылэ потэме бере шорам паймыса учкизы. Но Азвесь даурысь кылбурчилэсь но артистлэсь А. Вертинскийлэсь «Дни бегут» кырӟанзэ мытэме бере учкисьёслы но дунъясьёслы валамон луиз. Ваньмыз со тупа вал ХХ даурлэн кутсконэзлы но быръем произведенилы. Собере жюри монэ мае ке классикаез быдэстыны куриз на. Кырӟай тодмо ӟуч композиторъёслэсь А. Варламовлэсь «Что мне жить и тужить» но В. Гаврилинлэсь «Любовь останется» романсъёссэс.

Фестивале вуэмъёсты дунъязы Россиысь искусство удысысь дано ужась И. Шведова, Россиысь Композиторъёслэн союззылэн ёзчиез В. Вовченко, тодмо крезьгурчи В. Трофимов но В. Толкуновалэн агай-вынъёсыз, артистъёс Сергей но Владимир Толкуновъёс. Удмуртиысь кырӟасьлы ваньзы ӟеч дунъет сётӥзы.

Шаерысьтымы учкисьёслэн луонлыксы вань матысьгес тодматскыны Лилия Третьяковалэн творчествоеныз — 21-тӥ шуркынмонэ Удмурт кун филармониын ортчоз солэн концертэз. Лилия Третьякова Удмуртиысь дано артистэн Алексей Городиловен быдэстозы шлягеръёсты.

Галина Семёнова

Туспуктэм: udmfil.ru

 

 

Источник: газета Удмурт дунне   http://udmdunne.ru/2015/10/rossilehn-syulehmyz-udmurtiys/